கிறிஸ்துவின் சேனைகள் என்னும் துறவர சபையை சேர்ந்த அருட்பணியாளர் சால்வடார் நுனோ 2023 ஜனவரி 27ஆம் தேதி தன்னுடைய முகநூல் பக்கத்தில், விபத்தில் சிக்கியவரின் அற்புதமான பாவ சங்கீர்த்தனம், எனும் தலைப்பில் ஒரு உண்மை நிகழ்வை பகிர்ந்து கொண்டார்.

ஜனவரி மாதம் 27 ஆம் தேதி காலை வேளையில், நான் எனது பெற்றோர் மற்றும் சகோதரர் அலெக்சுடன் காரில் பயணம் செய்து கொண்டிருந்தேன். நான் ஒரு கத்தோலிக்க குருவானவர், என் தம்பி அலெக்ஸ் ஒரு தோல் மருத்துவர். நாங்கள் எங்களுடைய காரில் பயணம் செய்து கொண்டிருந்த போது, எங்களை கடந்து சென்ற ஒரு கார் திடீரென ஓட்டுனரின் கட்டுப்பாட்டை இழந்து தாறுமாறாக ஓடி விபத்துக்குள்ளானது. நான் அக்காரின்  அருகே சென்று காரில் இருப்பவர்களுக்கு ஏதாவது உதவி தேவைப்படுமா என்றறிய விரும்பினேன். தேடியபோது அந்த காரை ஓட்டி வந்த நபர் மட்டுமே காரினுள் இருந்தார்.  நான் அவசரகால உதவிக்கான  911 எனும் பொது பாதுகாப்பு எண்ணையும் தொடர்பு கொண்டு விபத்தை பற்றி கூறினேன். பிறகு விபத்தில் சிக்கியவரிடம் நான் ஒரு கத்தோலிக்க குருவானவர், இவர் என் சகோதரர், இவர் ஒரு மருத்துவர். உங்களுக்கு என்ன உதவி வேண்டும் கேளுங்கள் என்று கூறினேன் அப்போது அந்த மனிதர் எனக்கு இப்போது ஒப்புரவு அருள் சாதனம் தர முடியுமா என்று கேட்டார்.

ஆம் ஒர் அற்புதமான ஒப்புரவு அருள் சாதனம். அவர் மீண்டும் இவ்வுலகில் புது மனிதனாய் பிறப்பதற்கு இந்த ஒப்புரவு அருள்சாதனம் வழியாக ஆண்டவர் அவருக்கு ஒரு வாய்ப்பை தந்திருக்கிறார். மருத்துவ உதவி தேவைப்படும் இந்நேரத்தில் எவ்வித முன் அனுமதியுமின்றி ஒரு தோல் மருத்துவரின் உதவியையும் அவர் பெற்றுள்ளார். நாம் இத்தகைய பயணங்களை மேற்கொள்ளும் போது ஆண்டவரிடமும், அன்னை மரியாளிடமும் நமது பயணங்களை ஒப்படைக்க மறவாமல் இருப்போம் என்று கூறி அருள்தந்தை நுனோ தனது பகிர்வை நிறைவு செய்கிறார்.