2023 ஆம் ஆண்டு நிவானோ அமைதிக்கான பரிசு இந்திய ஆர்வலர் பி.வி. இராஜ கோபால் அவர்களுக்கு வழங்கப்பட உள்ளதாகவும், மனித மாண்பு மற்றும் சம உரிமைகளை ஏழை எளிய மக்களுக்குப் பெற்றுத்தர காந்திய வழியில் போராடும் அவரது முயற்சி போற்றுதலுக்குரியது என்றும் ஃபிளமினியா ஜியோவனெல்லி கூறியுள்ளார்.

நிவானோ அமைதி அறக்கட்டளையால் வழங்கப்பட உள்ள சிறப்புமிக்க விருதான 40ஆவது நிவானோ அமைதி விருது, இந்தியர் பி.வி. இராஜகோபாலுக்கு வழங்கப்பட உள்ளதாக அவ்வறக்கட்டளையின் உறுப்பினரும், திருப்பீடத்தின் ஒருங்கிணைந்த மனித மேம்பாட்டை ஊக்குவிக்கும் பணித்துறையின் முன்னாள் துணைச்செயலரான ஃபிளமினியா ஜியோவனெல்லி அறிவித்துள்ளார்.

9 பேர் கொண்ட நிவானோ அமைதி அறக்கட்டளைக் குழுவானது திரு. இராஜகோபால் அவர்களின் வாழ்நாள் அர்ப்பணிப்பு, காந்தியக் கொள்கைகளின் அடிப்படையில் வன்முறையற்ற செயல்பாடு, இந்தியாவில் உள்ள ஏழ்மையான மற்றும் மிகவும் ஒதுக்கப்பட்ட மக்களுக்கு அவர் ஆற்றிய பணி ஆகியவற்றிற்காக இவ்விருது அளிக்கப்பட உள்ளதாக ஃபிளமினியா ஜியோவனெல்லி தெரிவித்துள்ளார்.

அமைதியான மற்றும் அகிம்சை முறைகளின் வழியாக தனது நாட்டின் ஏழை மற்றும் மிகவும் ஒதுக்கப்பட்ட மக்களுக்கு ஆதரவாக ராஜகோபாலின் நடவடிக்கைகள்  இருந்து  வருகின்றது என்றும், சாதி மற்றும் பாலின வேறுபாடு இல்லாமல் ஒவ்வொருவரின் சமமான மனித மாண்பு மற்றும் சம உரிமைகளை அங்கீகரிப்பதற்கான அவரது போராட்டம் பெரும் ஊக்கத்தை அளிக்கின்றது என்றும் ஃபிளமினியா ஜியோவனெல்லி குறிப்பிட்டுள்ளார்.

நிவானோ அமைதி அறக்கட்டளையால் வழங்கப்படும் மதிப்புமிக்க விருது, உலக அமைதிக்கான காரணத்தை மேம்படுத்தி, மதங்களுக்கு இடையேயான ஒத்துழைப்பில் குறிப்பிடத்தக்க பங்களிப்பை வழங்கும் தனிநபர்கள் மற்றும் நிறுவனங்களை கௌரவித்து  ஊக்குவிப்பதற்காக ஆண்டுதோறும் வழங்கப்படுகின்றது.

திரு.ராஜகோபால், 2023, மே 11 ஆம் தேதி, வியாழனன்று ஜப்பானின் டோக்கியோவில் நடைபெறும் விழாவில் பரிசைப் பெறுகிறார். விருதுச் சான்றிதழுடன் கூடுதலாக, அவர் ஒரு பதக்கத்தையும் இருபது மில்லியன் ஜப்பான் யென்களையும் பெற உள்ளார்.