பட்டியலினத்து மக்கள் மற்றும் பட்டியலின பழங்குடிகள் தங்கள் வாழ்வில் அன்றாடம் சந்திக்கும் அவமானங்கள், அடக்குமுறைகள், வன்கொடுமைகளுக்கு எதிராகத் தொடர்ந்து குரல் எழுப்பி, அவற்றைப் பற்றி பல்வேறு பத்திரிகைகளில் கட்டுரைகளாக எழுதி, தனது கண்டனத்தைப் பதிவு செய்து வரும் அருள்சகோதரி ரொபான்ஸி அ.ஹெலன் அவர்களுக்கு இந்தியக் கத்தோலிக்கப் பத்திரிகை சங்கம் விருது வழங்க இருக்கிறது.

அருள்சகோதரி ரொபான்ஸி அ.ஹெலன், தலித் மக்களுக்கு ஏற்படும் சோதனைகளையும், வேதனைகளையும் பற்றி மிக ஆழமாகச் சிந்தித்து, பல அற்புதமான படைப்புகளை எழுதியிருக்கிறார். பட்டியலின மற்றும் பழங்குடி மக்களின் வாழ்க்கைத் தரத்தை உயர்த்துவதற்காகப் போராடும் போராளிகளுக்கு மரியாதை செலுத்தும் விதமாக இந்தியக் கத்தோலிக்கப் பத்திரிகைச் சங்கம் வழங்கும் இந்த விருதுக்கு இந்தியக் கத்தோலிக்க ஆயர்கள் பேரவையின் பட்டியலின மக்கள் மற்றும் பிற்படுத்தப்பட்ட மக்களின் நலனுக்காகச்  செயலாற்றி வரும் ஆணையமானது நிதியுதவியை அளித்து வருகிறது.

2023, செப்டம்பர் 23 ஆம் தேதி கொச்சியில் நடைபெறவுள்ள இந்தியக் கத்தோலிக்கப் பத்திரிகைச் சங்கத்தின் பொதுக்கூட்டத்தின்போது இவ்விருது வழங்கப்படும்.